නිරවුල් ඉඩමක් සුන්දර නිවෙසක්

Monday 31 December 2018 | 121 Views

සුවපත් කරගැනීමට වෙහෙසෙනවාට වඩා වළක්වා ගැනීම වඩා යහපත්

මිනිස් ප‍්‍රජාව විවිධාකාර සිහින දකිති. තමන්ගේම ඉඩමක තමන්ගේම කියා නිවෙසක් තනාගැනීම ඒ සිහින අතරේ එක් සිහිනයක් පමණි. ඒ වෙනුවෙන් ඔවුහු බොහෝ වෙහෙසෙති. ගෘහ නිර්මාණ ශිල්පීන් සොයා යති. වාස්තු විද්‍යාඥයින්ගේ උපදෙස් පතති. එහෙත් නිවෙස ඉදිකර ගැනීම සඳහා මිලදී ගනු ලබන ඉඩමෙහි හිමිකම සොයාබැලීම කෙරෙහි ඔවුහු අඩු අවධානයක් දක්වති. වර්තමානයේ අධිකරණය ඉදිරියේ විවාදයට ලක්වන ඉඩම් ආරවුල් පිළිබඳ නඩුහබවලට මූලික හේතුව කුමක්ද යන්න සොයාබැලීමේදී ඒ බව පැහැදිලි වේ. එබැවින් තමන්ගේම නිවෙසක් තනාගැනීම පිණිස ඉඩමක් මිලදී ගැනීමේදී ඔබ විසින් අවධානය යොමු කළයුතු කරුණු පිළිබඳ සරල අවබෝධයක් ලබාදීම මෙම ලිපියෙහි අරමුණයි.

මුලින්ම, ඔබ විසින් මිලදී ගැනීමට අපේක්‍ෂිත ඉඩමෙහි පෙළපත වසර 35ක් පමණවත් ආපස්සට විමසා බැලිය යුතුය. මේ සඳහා ඉඩම අයත් ඉඩම් ලියාපදිංචි කිරීමේ කාර්යාලයේ එකී ඉඩමට අදාළව පවත්වාගෙන යනු ලබන පෙළපත් සටහන් පරීක්‍ෂා කර බැලීම අවශ්‍ය වන අතර, එමඟින් ඔබ මිලදී ගැනීමට බලාපොරොත්තු වන ඉඩම හොඳ හිමිකමක් සහිත ඉඩමක් ද යන්න දැනගත හැකිවෙයි. එහිදී ඉඩම යම් ආයතනයකට හෝ තැනැත්තෙකුට උකස් කර තිබේද? උකස් කර තිබේ නම් එකී උකස නිදහස් කළ බවට කරන ලද සටහන් ඇතුළත් කර ඇත්තේද? යන්න පිළිබඳව අවධානය යොමු කළයුතු වේ.

තවද පත්ඉරු සටහන් පරීක්‍ෂා කිරීමේදී මිලදී ගැනීමට අපේක්‍ෂිත දේපළ, නොබෙදූ දේපළක් නොවන බවට තහවුරු කරගත යුතුයි. මන්ද නොබෙදූ දේපළක් වුවහොත් පවතින්නේ හවුල් අයිතියක් පමණක් වන බැවින්, අයිතිය සම්බන්ධව ගැටලු මතුවීම නොවැළැක්විය හැකිවනු ඇත. එහෙයින් පිඹුරක් මඟින් මැන, බෙදා වෙන්කරන ලද කොටසක් ලෙස ලියාපදිංචි වී ඇත්නම් එහිදී හිමිකම පිළිබඳ නොබෙදූ අයිතියක ගැටලුවක් පැන නොනගිනු ඇත.

මේ ආකාරයට පත්ඉරු සටහන් පරීක්‍ෂා කිරීමේදී අයිතිය දම්වැලක පුරුක් මෙන් එකිනෙක අමුණා ඇති අයුරින් නිරායාසයෙන් ගලා ගොස් තිබිය යුතුය. යම් තැනකදී දම්වැලෙහි පුරුකක් හෝ බිඳී තිබුණහොත් එය අයිතිය පිළිබඳව පවතින ගැටලුවක් කියා පාන්නක් වේ.

උදා: කමලා —> නිමල්
නිමල් —> රසික
රසික —> රංජිත් යනාදී වශයෙනි

මීළඟට ඔබ විසින් විමසුම් කළයුතු මූලික කරුණ වන්නේ, ඉඩමට පිවිසීම සඳහා පැහැදිලි මාර්ගයක් තිබෙනවා ද යන්නයි. ප‍්‍රාදේශීය සභාව මඟින් හෝ පළාත් පාලන ආයතනයක් මඟින් හෝ මාර්ග සංවර්ධන අධිකාරිය මඟින් හෝ නඩත්තු කරනු ලබන මාර්ගයක් නම් ගැටලුවක් නොවනු ඇති අතර, එහෙත් ඉඩම් කොටස් කිහිපයකට පමණක් පිවිසිය හැකි පරිදි පුද්ගලික පාරක් පවතින විටක ඒ පිළිබඳව ඔබ සැලකිලිමත් විය යුතුය. එහිදී එම පාර භාවිත කිරීම සඳහා ඉඩමේ හිමිකරුට ඉඩම අයිති වුණු ඔප්පුවෙහි එම මාර්ගය ඉඩමට පිවිසීම සඳහා භාවිත කළහැකි බවට ප‍්‍රකාශිතව සඳහන්වීම අත්‍යවශ්‍ය කරුණකි. ඉඩමට පිවිසීම සඳහා පුද්ගලික මාර්ගයක් තිබී ඒ බව ඔප්පුවෙහි සඳහන් නොවුණු අවස්ථාවක ඉඩමට යාමට ඒමට ඇති අයිතිය පසු අවස්ථාවකදී අහිමි වී ගිය විටක ඔබව සිරකරුවකුගේ තත්ත්වයට නිතැතින්ම පත්වන අතර, පාර භාවිත කිරීමේ අයිතිවාසිකම ලබාගැනීම සඳහා අධිකරණයේ පිහිට පැතීමට ඔබට සිදුවනු ඇත.

තවද ඉඩම් ලියාපදිංචි කිරීමේ කාර්යාලයේ ඔබ මිලදී ගැනීමට බලාපොරොත්තු වන ඉඩමට අදාළව දක්වා ඇති ඉඩමේ මායිම් සහ ඉඩම මැන පෙන්වා ඇති පිඹුරෙහි දක්වන මායිම් සහ ප‍්‍රමාණය එකිනෙකට ගැළපිය යුතු අතර, නිවැරැදි ද විය යුතුය. අනිවාර්යයෙන්ම පත්ඉරු සටහන්වල දක්වන පිඹුර සහ ඔප්පුවෙහි දක්වන පිඹුර එකක් වියයුතු අතර, ඉඩමේ හිමිකම පරීක්‍ෂා කිරීමට අයිතිකරු විසින් ඔබට ලබාදී ඇති පිඹුර ද එකක්ම විය යුතුය. ඒ අනුව ඉඩම මැන දක්වනු ලබන පිඹුරෙහි පෙන්වා ඇති කරුණු කෙරෙහි ද ඔබ, ඔබගේ අවධානය යොමු කළ යුතුය.

ඉහතින් දක්වා ඇති කරුණු පිළිබඳව සොයාබැලීමේදී විෂය පිළිබඳ පළපුරුදු නීතිඥවරයෙකුගේ සහාය ලබාගැනීමට ඔබට සිදුවන අතර, එහෙත් එකී කරුණු පිළිබඳ දළ අවබෝධයක් හෝ ඔබ සතු නම් වඩාත් නිවැරැදිව විමසීමේ හැකියාව ඔබට ලැබෙනු ඇත.

ඉඩමෙහි හිමිකම නිරවද්‍ය බවට ඔබ විසින් තහවුරු කරගත් පසු ඔබට ලබාදී ඇති ඔප්පු පිටපතෙහි හා පිඹුරෙහි දක්වා ඇති ඉඩමේ ප‍්‍රමාණය සැබෑවටම ඇති ද යන්න තහවුරු කරගත යුතු වන අතර, ඒ සඳහා ඉඩමේ හිමිකරු විසින් මායිම් පෙන්වන ලද ඉඩම බලයලත් මිනින්දෝරු මහතකු ලවා මැනගැනීම උචිත වේ. එහිදී මායිම් අසල ඇති ඉඩම්, මායිම්, තාප්ප හෝ කටු කම්බි වැටක්වත් ගසා නොමැති හිස් ඉඩම් නම් ඔබ ඒ කෙරෙහි ද අවධානය යොමුකිරීමෙන් ඔබට අයහපතක් නොවෙනු ඇත.

මේ ආකාරයට ලිඛිත නීතිමය තත්ත්වය සොයා බලනවාට අමතරව අදාළ ඉඩම අවට වාසය කරන අසල්වැසියන්ගෙන් නිකමට හෝ විමසීමක් කිරීම මෙන්ම ග‍්‍රාම නිලධාරීවරයා වෙතින් විමසා බැලීම ද සුදුසු ය.

ඉහතින් ඔබට විස්තර කරන ලද්දේ සින්නක්කර ඉඩම් මිලදී ගැනීමේදී සොයාබැලිය යුතු නීතිමය තත්ත්වය වන අතර, ස්වර්ණ භූමි, ජයභූමි ආදී රාජ්‍ය අනුග‍්‍රහය මත හිමිවූ ඉඩමක් නම් ඒ සඳහා සොයාබැලිය යුතු කරුණු සහ අදාළ වන නීතිමය තත්ත්වය මීට වඩා වෙනස් වේ. වර්තමානයේ අධිකරණයන්හි විභාග වන ඉඩම් නඩුවල ස්වභාවය දෙස බැලීමේදී වංචනික පෙළපත් සාදා වෙනත් අයකුට අයිති ඉඩම් විකිණීම, හවුල් අයිතිවාසිකම් නිරවුල් කරගැනීමට සිදුවීම, ඉඩමට පිවිසීම සඳහා මාර්ග අයිතිය ලබාගැනීම සඳහා අධිකරණයේ පිහිට පැතීමට සිදුවීම, පිඹුරෙහි මෙන්ම ඔප්පුවෙහි දක්වා ඇති ඉඩම් ප‍්‍රමාණය සැබෑවටම නොමැතිවීම ආදී කැරණු මූලිකව දැකිය හැකිය. එබැවින් ඔබ ඉඩමක් මිලදී ගැනීමට බලාපොරොත්තු වන්නේ නම්, වඩා විමසිලිමත්වීම ඔබට යහපතක් කරනු ඇත. ඔබගේ කාලය, ශ‍්‍රමය මෙන්ම ධනය ඉතිරි කරගැනීම සඳහා වරක් දෙවරක් නොව තවත් වරක් කරුණු සොයාබැලීම කළ යුතුම කාර්යයක් ලෙස සැලකුවාට එහි වරදක් නැත. ඔබගේ සාමාන්‍ය දැනුමට ඉහත කරුණු එකතු කරගැනීම තුළින් නිරවුල් ඉඩමක සුන්දර නිවෙසක් තනාගෙන ඉඩම් නඩුවලට නොපැටලී ජීවත්වීමට ඔබට හැකිවනු ඇත.

නීතිඥ ගංගා උදය කුමාරි
අනුරාධපුරය

Like and Subscribe

Article එක හොදයි නම් / ලස්සනයි නම් / දෙයක් ඉගෙන ගත්තා නම් ලයික් කරන්න

මේ රතු පාට button එක ක්ලික් කරලා අපව සබ්ස්ක්‍රයිබ් කරන්න.


Your Reaction

Do you like this post?
  • Fascinated
  • Happy
  • Sad
  • Angry
  • Bored
  • Afraid

Share This Article

Leave a Reply

Comments